Dipolog City – Gumikan sa panagdasmag sa duha ka motorsiklo, patay ang usa ka motorista ug usa usab ang nagrabehan atol sa maong aksidente sa may dalan Montaño, barangay Turno ning dakabayan sa Dipolog, alas 10:30 pasado sa niaging gabii.
Ang imbistigador nga si PO1 Rachjick Necesario sa Dipolog PNP niila sa namatay nga si Ocias Banas Nalzaro, 59 anyos, minyo usa ka panday nga taga barangay Sta. Felomina.
Sa pakisusi sa imbistigador atol sa fiesta sa barangay Turno si Nalzaro naka-inom ug bino nagmaniho sa iyang motorsiklo honda dream na walay suga kinsa gikan sa ilang balay paingon sa barangay Turno kon diin pag abot crossing sa dalan Motaño sa iyang pagliko aksidenteng nadasmagan sa kasugat nga motorsiklo honda wave nga gimanihoan ni Danilo Empremiado, 31 anyos nga taga barangay Dicayas padulong usab sa barangay Sta. Felomina niadtong higayona.
Nasayran ang duha wala nakahelmet, nangalamba sa samentadong karsada ug polos gidala sa Zamboanga del Norte Medical Center apan si Nalzaro tungod sa grabeng kadaut sa iyang ulo nakabsan kini sa iyang kinabuhi.
Samtang si Empremiado nga nakaangkon usab og grabeng kadaut sa iyang lawas, padayon nagpaalim sa angol nga nahigoman. (-r.m-)
