2 mojer arestao na entrapment

Ta prepara ya el caso de large scale estafa el maga pulis contra con un antes empleyao del un private book keeper despues conele y su compañera ya cuji na un entrapment operation na Valderosa Street del Martes tarde.
Con el suspechao ya conose como si Kristel Jane Enriquez, 23, dalaga de Divisoria y su uban si Mabeth Munzon, 34, de San Jose Road, Blaiwasan.
Con el suspechao y su uban ya agwanta el maga pulis del Station 11 despues estos ya recivi el marked boodle money balor de P95,000.
Asegun desde aquel tiempo ta trabaha pa si Enriquez con Josephine Cariit manada ya vez donde gendeh este ta remiti el cen del diila maga cliente na BIR como impuesto hasta ya tene que termina conele su employer.
Pero asegun ta continua este conduci transaction con el diila maga cliente y gendeh este ta remiti maga impuesto na BIR.
Porcausa con este unu del diila cliente quien ya pidi para no mas ya nombra conele, ya hace el reclamo na pulis y ya conduci el entrapment operation.
Fuera con este asegun con Cariit ya descubri sila que tiene pa valor de P3.8 million nohay tambien remiti si Enriquez na BIR pormedio de depositar na Land Bank qu8e asegun impuesto era quell del un grande tienda na ciudad.
Ta verifica pa ahora el maga pulis cosa cosa pa otro maga establisimiento el ya queda victima de Enriquez.