TACLOBAN CITY – Duha nga battalion han 8th Infantry Division han Philippine Army an mabalik na ha Probinsya han Samar agud bumulig ha paghatag hin seguridad ha lugar nga tarhog han New People’s Army, ini an gin-kompirma ni Samar Governor Sharee Ann Tan-De Los Santos basi han diskusyon nira ni Presidente Rodrigo Duterte ngan mga hataas nga opisyales han Armed Forces of the Philippines.
An 34th IB ngan 46th IB in ha pagka-yana in naka deploy ha Marawi City matapos an pag atake han maute group ha Marawi City dida han Mayo 2017.
Ugsa an deployment, an kampo han 34th IB in naka-base ha Catubig, Northern Samar ngan ha Base, Samar naman an 46th IB.
Dugang pa ni Tan, yana nga tuig an saad nga mabalik na an duha nga battalion.
Ini daw in dako an maibubulig ha rehiyon ha pagsulbar han problema ha rebelyon ha Sinirangan Bisayas ngan agud tim-os na nga ma-implementar an programa ha inprastraktura ha mga conflict areas.
Labot la han 34th ngan 46th IB, duha pa nga battalion tikang ha Eastern Visayas an nagpapabilin ha Mindanao.
