2 nga jail guard, usa nga sibilyan gin-ambush, patay

2058

TACLOBAN CITY – Tulo an kompirmado nga namatay ha nahitabo nga ambush ha Barangay Tagbubunga, Villaba Leyte kakulop, April 16.

Duha an namatay nga jail guard han Palompon Leyte Sub Provincial Jail ngan usa nga sibilyan.


Ginkilala an mga namatay nga jail guard nga hira Leo Gonzales, residente ha Tabango Leyte ngan Genesis Piamonte, residente ha San Isidro, Leyte.

Ginkilala naman liwat an namatay nga sibilyan nga hi Apolinario Escoton, residente ha Palompon Leyte.

Talwas naman an lima nga inmates nga hira Ramonito Tahanlangit; Ronnel Tahanlangit; Ronnie Pagatpat; Jeremy Dabacol ngan Renan Dawaton.

Subay ha inisyal nga imbistigasyon, sakay hin traysikol an mga jail guards upod an lima nga inmate tikang ha Villaba pauli na ha Palompon, Leyte.

Pag-abot ha Tagbunganga, tigda nga nagpakita an mga riding-in-tandem ngan ginpamumusil an duha nga jail guard.

Naigo hin bala han pusil an drayber han traysikol nga dayon niya nga iginkamatay.

Nakalukso naman an nakaposas nga lima nga inmates.

Ha report han Villaba PNP, ruba an service vehicle han mao nga sub provincial jail amu gumamit nala hira hin pampasahero nga traysikol.

Waray naman maka-eskapo an mga inmates ha nahinabo nga ambush.

Nagpapadayon naman an imbistigasyon hini nga insidente.

Facebook Comments

From Advertisers