TACLOBAN CITY – Patay na han makit-an han mga kag-anak an ira duha nga anak ha banwa-on nga lugar ha Calbayog City, Samar dida han huwebes, February 28, 2019.
Subay han report tikang ha Police Regional Office 8, duha nga babayi nga nag-eedad 16 ngan 6 anyos nga mga minor de edad an waray na kinabuhi.
Nagawas ha inisyal nga imbistigasyon han mga kapulisan, an duha nga kabataan in bumisita dida han nakalabay nga sabado, February 23 ha ira lolo nga hi Apolonio Somodoy Meregildo, 64 anyos ngan usa nga parag-uma. Umuli gihapon an duha nga biktima pagkabuwas, February 24.
An nanay han duha nga bata nga hi Chona Meregildo, 38 anyos in waray na mahimutang tungod nga upat (4) na kaadlaw nga nawawara an duha niya nga anak sanglit personal niya nga ginbisita hi Apolonio para panginanuon an iya mga anak pero sumala kan Apolonio umuli na an iya duha nga apo.
Sanglit nalisang na hira pagpinamiling ha duha nga bata. Nakit-an ini nira nga patay na ha mabanwa nga lugar ha usa nga barangay.
Nagpapadayon an imbistigasyon han mga otoridad para mabaruan kun ano ba talaga an natabo han duha nga minor de edad.
