CAPOOCAN, LEYTE – Nabalikad ngan nahihapil an pampasahero nga van matapos nga mabunggo ini han nawarayan nga preno nga truck ha Brgy. Cabul-an, Capoocan, Leyte, alas 9:15 han aga kakulop.
Nabunggo gihapon han truck an usa pa nga passenger van nga nakilala nga Grandtours van.
Ha interview han RMN kan PSInsp. Arnel Surigumba, Chief Of Police han Capoocan, Leyte, naglilikay na unta an duha nga van ha nawarayan preno nga truck pero tungod han malaksi nga dalagan hini ngan han kakuri nga agian nga kalsada, waray na makalikay an mga passenger van.
26 katawo an igindalagan ha magkadurudilain nga hospital ngan sumala han report makuri an kabutang han driver han truck ngan pira nga pasahero han mga passenger van.
Tikang ha Tacloban an duha nga pampasahero nga van tikadto ha Biliran samtang an truck naman in tipaTtacloban tikang ha Ormoc City, Leyte.
Ginkilala an driver han truck nga hi Tirzo Carbon, gintatag-iyahan an truck han Sultan Kudarat Milling and Trading.
Kakaistroyahon pa han mga kapulisan an mga na-injured nga pasahero kun magpapasaka hira hin kaso kontra ha driver ngan ha tag-iya han truck pero sumala kan PSInsp. Sarigumba, multiple injury ngan damage to property an pwede ipasaka nga kaso kontra ha ira.
