TACLOBAN CITY – Ginpamumusil han riding in tandem an usa nga lalaki nga nanginginano han iya truck nga nakapark ha atubangan han Nutribake Inc., YKS Complex, Brgy. 68 Anibong, Tacloban City kanina han alas 6:40 han aga, June 3.
Subay ha report han Police Regional Office 8, ginkilala an bikitma nga hi Eduardo Abrahan Bosito Sr., 50 anyos, may asawa, usa nga self-employed ngan residente ha nasabi nga lugar.
Nagawas ha inisyal nga imbistigasyon han mga otoridad nga ginchecheck han biktima an iya truck nga nakapark ha prente han YKS Compound han tigda nga umabot an duha nga suspek sakay hin motorsiklo ngan ginpamumusil an biktima.
Dayon naman nga gindara an biktima ha hospital para matambal.
Kanina naman han mga alas 4 han kulop, ginpamumusil patay an usa nga lalaki ha Maharlika Highway, Caibaan Tacloban City.
Ginkilala an biktima nga hi Jason Cada nga residente ha nasabi nga lugar.
Sumala kan Tacloban PNP station 1 commander P/Major Jesus Esoy, tikang pala ha downtown an biktima upod an anak hini han ginpusil han mga diri pa makilal-an nga mga suspek.
Sumala han witness, sakay han white van an mga suspek.
Nagpapadayon an imbistigasyon han mga otoridad.
