TACLOBAN CITY – Duha nga kasundaluhan an magrerescue unta ha mga residente ha Barangay Hinagoyonon ha bungto han Catubig ha Northern Samar an gin ambush han gin aaligar mga myembro han National People’s Army o kun NPA.
Ha impormasyon nga nakuha han RMN Tacloban, naigo hin bala hin pusil hi PFC. Roland Gomez dapit ha iya pig-i ngan hi CPL. Yzazel Laure in naigo dapit ha iya tiyan.
Sumala kan lt. Michelle Estares, information officer han 20th Infantry Batallion, 50 kabug-os nga mga gin aaligar NPA an nagpa-uran hin bala ngadto ha duduha nga mga kasundaluhan.
An duha nga sundalo in kaparte han 14 nga kasundaluhan nga pumakadto ha Brgy. Hinagoyonon ha Catubig para buligan an mga residente nga apektado han tubig-baha durot han makusog nga pag uran han Bagyong Urduja.
Yana, maupay na iton inaabat han duha nga sundalo.
Nagdudumara hin hot pursuit operation an 20th IB kontra ha mga rebelde nga grupo.
Na-admit an duduha nga sundalo ha Catarman Community Hospital ha Catarman Northern Samar.
Padayon nga nag aaghat an Philippine Army ha mga rebelde nga summurender na kay may maupay nga kinabuhi an naghuhulat ha ira pag umaklas na hira ha mga terrorista.
