TACLOBAN CITY – Patay an usa nga pulis, usa nga sibilyan samtang upat (4) an samaran nga kapulisan ngan siyam (9) nga sibilyan ha ambush han mga gintutuuhan New People’s Army (NPA) ha Borongan City, Eastern Samar kanina han alas 3:00 han kulop, December 13.
Sumala kan P/Lt. Col. Ma. Bella Rentuaya, ginkilala an namatay nga pulis nga hi Pat. Rama. Samaran naman hira Pat. Capoquian; Pat. Operario; Pat. Luterte; ngan Pat. Sobrepena. Safe naman hira Pat. Godino ngan Pat. Pajanustan.
Usa naman nga sibilyan nga babayi an namatay ngan siyam (9) an samaran.
Ha inisyal nga imbistigasyon, tikang ha opisina han Public Mobile Force Company an mga kapulisan ngan tipakadto ha Provincial Headquarters han PNP ha Eastern Samar pero samtang nira ginbabaybay an kakalsadahan sakay han patrol car, tigda nala may mga bumuto nga bomba.
Sakay naman han sidecar an mga sibilyan nga ginbabaybay gihap an nasabi mga kalsada.
Padayon an imbistigasyon han mga otoridad.
