MURCIA, NEGROS OCCIDENTAL – Duha ang patay, duha ang pilason matapos gintiro kag ginlabo bangud sang kumplikto sa duta sang isa ka pamilya kag ginpa-lala pa sang hinubog nga istorya kagab-i sa Brgy. Buenavista, banwa sang Murcia.
Nakilala ang mga biktima nga nagkalamatay nga amo sanday Wilfred Berganio, 28 anyos, naigo sang bala sa iya kilid kag may labo sa ulo, subong man ang iya sini amay nga si Wendro Berganio, 56 anyos kag may igo man sang bala sa iya lawas.
Ang pilason naman amo sanday Dennis Berganio, 52, may igo sang labo sa iya ulo kag si Danniel Berganio, 20 anyos, may igo sang labo sa kamot kag ulo.
Suno sa imbestigasyon sang Murcia Municipal Police Station nga may mga las 11 kagab-i sa Sitio Anangue, Brgy. Buenavista natabo ang pag-ilinaway sang mag-pamilya bangud sang ila na sadto pa kumplikto sa duta.
Sa interview sa asawa ni Wilfred nga si Rina, iya ginsiling nga kagab-i bangud nga hubog na ang mga biktima ini sila ang naglinalisay tubtub nga naglab-ot sa punto nga ini sila ang naglinab-anay kag nagtiruhay.
Ang mga nasamaran padayon karon nga confined sa Corazon Locsin Montelibano Memorial Regional Hospital.
