Usa ka sundalo ug usa ka gituohang myembro sa New Peoples Army (NPA) ang namatay human sa engkwentro tali sa military ug rebelde sa brgy. San Isidro sakop sa lungsod sa Osmeña ning atong probinsya niadtong sabado sa gabie mga alas 8 takna kapin kun kulang.
Matod ni Lt. Col Marlowe Patria, commander sa 53rd Infantry Batallion sa Philippine Army, nagpahigayon ug combat operation sa pagpanguna ni 1Lt Abner Pilandao ang maong mga sundalo sa brgy. San Isidro sa dihang ilang na engkwentro ang mga armadong komunista.
Nagpahigayon matod pa ug operasyon ang mga sundalo human nakadawat ug taho nga adunay rebeldeng nanghasi ug buot mo patay sa usa ka sibilyan didto sa brgy. San Isidro, hinungdan nga nagpahigayon ug combat operation para ma pugngan ang plano sa rebelde.
Milungtad sa 15 minutos ang pagsinukliay ug buto, maayong pagka igo sa ulo ni Sgt. Rolly Barimbao diha-diha gibawian kini sa hinulamang kinabuhi.
Patay usab ang usa sa gitoohang NPA nga nailang si Win Taata nga taga bryg. Kauswagan sakop sa maong lungsod, narekober usab ang mga magazine sa AK-47 assault rifle nga ge turn over sa mga opisyal sa nahisgutan nga lungsod.
Gi dugang pa ni Patria, bitbit sa mga rebeldeng NPA ang mga samaran nilang kauban base na usab kini sa dugo nga nahibilin sa ilang ge pang agian.
Ge kondena ni Maj. Gen. Roseller Murillo, commander sa 1st infantry Division ang pagpanghasi sa mga NPA.
Sa pagkakaron nagpadayon pa ang ilang pagpahigayon ug operasyon batok sa mga rebelde, samtang giingon usab nga bayani si Barimbao human namatay samtang nagprotehir sa mga residente ug sa mga komunidad.
Nagsaad usab ang heneral nga ipadayon nila ang paggukod sa komunistang rebelde pero abli pa gihapon sila sa buot motahan.
Sa Laing bahin nag awhag usab si LT Abrito nga mobalik na sa sabakan sa gobyerno tungod kay daghan ug mga programa ang gobyerno nga ihatag sa mga motahan nga rebelde, aron sa ingon mapahiluna ug hapsay ang pamuyo, nag awhag usab sa katawhan nga undangon na ang paghatag ug suporta sa walhong kalihukan ug ipadayon ang pagtinabagay para makab-ot ang kalinaw ug kalambuan*.*
