Davao City- Nalangan sa pagsulod dinhi sa syudad sa Davao ang duha ka mga Public Utility Jeepney (PUJ) luwan ang mga mag-uuma ug mga mamumu-o alang sa rally karong adlawa gumikan sa naandang inspeksyon ug beripikasyon sa mga awtoridad sa checkpoint sa Calinan ning syudad.
Kini ang klaripikasyon ni Task Force Davao Commander Col. Nolasco Mempin agi’g tubag sa gi-post ni Bagong Alyansang Makabayan (BAYAN) Secretary General Sheena Duazo sa iyang facebook account nga matud pa gibabagan ug wala tuguti ang maong grupo sa pag-entra dinhi sa dakbayan.
Segun ni Mempin nagpatuman lamang sila sa hugot nga pag-inspeksyon aron maseguro nga walay musagol nga mga dautang elemento diha sa pundok sa mga raliyista.
Subling gipahimangno ni Mempin ngadto sa publiko ug sa mga raliyista nga dili magdala og mga hinagiban ug uban pang mga deadly weapons sanglit ila kining kumpiskahon.
Panawagan usab sa TF Davao Commander sa tanan nga muapil sa rally karong adlawa apan mag doble igmat ug magmabinantayon sa tagsa-tagsa nila ka mga palibot.
RadyoMan Aimee Guinita
