Gikumpirma ni Police Major Ricky Obenza, Station Commander sa Calinan Police sa interbyu sa DXDC RMN Davao kang duha sa mga pulis ang namatay sa pagpanigbas nga giidentipika nga sila PCpl. Mark Anthony Corsino ug PSMS Tito Lague samtang samdan sila PCpl. Ken Leo Gumanoy ug kritikal ang mobile driver nga si Donald Ombrete.
Segun ni Obenza, giadtuan sa mga pulis ang area human nagpatabang ang mga residente tungod adunay nahitabong komosyon apan kalit na lang giataki ang mga nirespondeng mga personahe.
“Pag-assist sa atong tropa gidasmagan sila sa mga suspek nga mga nitibo nga pulahan, naay agimat. Nakapaboto pa ang atoang tropa kaya lang natumba kay dili man gyud madutlan. Hurot ang atong bala kaya naabtan gyud atoang tropa, naabtan gyud ang tropa,” sulti ni Obenza.
Matud ni Obenza, na-neutralisa usab ang suspek nga sakop sa Tribong Matigsalug nga si Benao Maanib Landas, 29 anyos taga-Kalayaan, Sitio Pangyan, Barangay Tamugan, Marilog District ug sikop ang usa pa ka suspek nga si Rico Masacay, 25 anyos, residente sa Sito Malikongkong, Brgy. Gumitan, Marilog Dist., Davao City.
Giklaro ni Obenza nga walay pangayaw na nahitabo sa nasangpit nga lugar.
Gipalawman pa sa kapulisan sa Calinan ang ugat hinungdan sa kagubot sa mga magka-tribu una pa man niabot ang mga pulis sa lugar.
RadyoMaN Aimee Guinita
