Davao City- Nisangpot sa maduguong insidente ang gilusad nga buy-bust operation sa kapulisan didto sa Chapter 9, Brgy Aplaya, Digos City, Davao del Sur.
Matud sa Digos City Police Station, nisukol ang mga target sa buy bust hinungdan nga nibalos ang mga awtoridad.
Patay ang duha ka mga suspetsadong sila alyas Ato, 30 anyos samtang ang laing namatay nga suspek padayon pang ginaila.
Matud sa kapulisan, gidala pa sa balay tambalan ang duha apan gideklara kining dead on arrival.
Samtang, sikop ang usa ka alyas Sheka, 23 anyos nga taga-Chapter 9, Tienda Aplaya, Digos City ug gikasuhan og paglapas sa RA 9165.
Gipanguluhan ni Provincial SOCO Acting Chief Police Major Tracy Sheryll Raotraot, ang imbestigasyon sa crime scene.
Narekober ang .38 revolver, lima ka mga basyo sa bala nga gituohang gikan sa 9mm pistol ug uban pang mga ebidensiya.
Musumada sa 90 gramos nga shabu ang nakuha nga adunay estimated street market value P1,350,000.00.
RadyoMaN Aimee Guinita
