Davao City – Kasong ‘reckless imprudence resulting to homicide and damage to property’ ang atubangon sa usa ka pedicab driver human sa bangga nga nahitabo sa Magsaysay, National road, Barangay Central, Mati City, Davao Oriental alas-7:15 kagahapon sa buntag (Marso 17, 2021).
Sa interbyu sa DXDC RMN Davao kang Police Staff Sergeant Christopher John Relabo, traffic investigator sa Mati City Municipal Police Station (MPS), giila niini ang biktima nga si Jason Candado, 20-anyos, residente sa Purok Aroma, Barangay Poblacion, Lupon, Davao Oriental. Samtang, ang driver sa pedicab mao si Ramil Salazar, 55-anyos, residente sa Magsaysay, Barangay Central, Mati City.
Saysay sa pulis, gikan ang motor sa Mati proper padulong sa Dahican sa dihang kalit na lamang nag-left turn o nisulod og kalit sa linya niini ang pedicab, hinungdan sa ilang pagbangga diin labing naigo ang ulo sa motor rider human kini wala nagsuot sa iyang helmet.
“Ang pedicab nisulod sa linya sa motor maong nabangga ang motor didto sa pedicab. Unya, ang ulo sa driver sa motor naigo didto sa atop sa pedicab, kanang bakal nga atop sa pedicab. Mao ‘toy hinungdan sa iyang kamatayon,” butyag sa imbestigador.
Nadala pa sa Davao Oriental Provincial Medical Center (DOPMC) ang biktima apan human sa kapin oras, nabugtoan na kini sa iyang gininhawa.
Nakahigom lamang og minor injuries ang driver sa pedicab ug naa na karon sa Mati MPS detention facility.
Panawagan sa pulis sa mga naga-motor nga kanunayng magsuot og helmet. Gawas niini, kinahanglan usab ang pagsayud o pagtuon sa mga balaod sa trapiko aron malikayan ang unsa mang disgrasya sa dalan.
RadyoMaN Kirby Manzon
