NEGROS OCCIDENTAL – Kapin 20 tanan ka mga puluy-an ang nawasak samtang walo ka mga tawo ang nasamaran sa nagtuhaw nga buhawi pasado las 8 kagab-i sa banwa sang Valladolid kag ciudad sang Bago.
Ginpahayag sang hepe sang Valladolild PNP nga si P/Sinsp. Junjie Liba, tatlo ka mga balay ang totally destroyed sa Brgy. Guintuliran nga ginapanag-iyahan nanday Jonathan Samira, Glenn Sibugan kag Michael Mindanao.
Samtang, lima naman ka mga balay ang nagkalaguba sa Brgy. Batwan kag nawasak man ang babuyan sang punong barangay sang Brgy. Ayungon, Valladolid nga si Enrico dela Gracia.
Mga 200 naman ka puno sang saging ang nagkalahapay sa amu nga buhawi sa Valladolid.
Samtang, sa ciudad sang Bago, ginpahayag naman ni C/Insp. Joeffer Cabural nga may walo ka mga balay ang apektado sa Purok Mahinagpanon kag San Nicolas sa Brgy. Sagasa.
