Rizal Zamboanga del Norte – Gisubay pa karon sa kapolisan kun unsa ang tinuod nga hinongdan sa pagkaluya ug hingpit nangakuyapan ang anaa sa 20 mga estudyante sa taliwa sa gipahigayong misa didto sa lungsod sa Rizal ning probinsiya sa Zamboanga del Norte.
Sa nahipos nga report gikan sa Rizal Municipal Police Station, nasayran ang mga biktima polos mga estudyante sa Colegio De San Francisco Javier nga anaa sa Barangay East Poblacion, lungsod sa Rizal.
Migawas sa imbestigasyon sa mga pulis, nagtigom ang mga estudyante sulod sa simbahan ug naguban uban mitambong sa gipahigayong santos nga misa.
Una niini, usa sumala pa sa mga estudyante ang mibati sa kalabad sa ulo ug naglisud sa pagginhawa, diin pipila ka mga gutlo nawad-an sa panimuot.
Hangtud nga nagsunud-sunod na sumala pa nakasinati sa parehong pagpanakit sa ulo, lisod sa paginhawa ug pagkaluya diin kalit lang nangawad-an sa panimuot ang mga estudyante nga miabot ngadto sa 20.
Gilayon kining gipangdala sa nagkadaiyang hospital ang mga biktima hinuon anaa na sa luwas nga kahimtang.
Ang Rizal Municipal Health Unit, wala pa nila natumbok sa karon kun unsa gayud ang hinongdan sa gidangatn sa mga estudyante.(rm)
