Davao City – Gikatakdang maghimo og assessment ang City Transport and Traffic Management Office kun CTTMO karong umaabot nga adlawng Sabado subay sa ilang gipatuman nga 20 sec yellow box rule dinhi sa syudad sa Davao niadtong adlawng Lunes, Hunyo 25.
Sa pakighinabi sa DXDC RMN Davao kang CTTMO head Dionisio Abude, ila pang tapukon ang reports gikan sa mga traffic enforcers kabahin sa maong balaod.
Sumala niya nga gitagana ang karon nga semana alang sa pagpahibalo ug pagpahimangno sa katawhan niining pagpatuman sa 20 segundo nga pag load ug unload sa mga pasahero sa pampublikong sakyanan sa gimungtar nga yellow box ngadto sa pipila ka mga dapit dinhi sa syudad.
Samtang gibutyag ni Abude nga magsugod ang CTTMO og isyu og citation tickets ngadto sa mga malapason sa maong balaod sunod semana.
Kahinumduman nga tuig 2012 pa gipatuman ang maong ordinansa apan matud ni Abude nga mas gipakusgan ug gipahugtan nila kini karon aron malikay sa bug-at nga trapiko sa syudad sa Davao.
RadyoMaN Renz Barbarona
