HINOBAAN, NEGROS OCCIDENTAL – Kapin 200 ka mga pamilya nga naga istar sa 3 ka mga purok sa Brgy. Alim banwa sang Hinobaan ang naapektuhan sang tuman nga pagbaha bangud sang pagbubo sang mabunok nga ulan kahapon sang hapon.
Ginpahayag nga may mg alas 3 kahapon sang hapon nagluntad ang daku nga pagbaha halin sa Alim River bangud sang pag-ulan nga naglawig sang halos 30 minutos.
Apektado nga mga pumuluyo amo ang mga naga-istar sa Purok 2, 3 kag Purok 4 sa amo nga barangay.
Lakip sa naapektuhan amo ang mga pananum sang human kag iban pa nga agricultural crops nga nahamtang malapit sa amo nga suba lakip na ang mga pamalay kag iban nga properties.
Angut sini, ginmandu sang mga barangay officials sa pagpamuno ni Punong Barangay Arnold Gallarda ang force evacuation agud makapangaman sa tion nga magbubo liwat ang mabunok nga ulan ilabi na sa kagab-ihon.
Nahibaluan nga ang mga pamilya nga apektado sang baha amo man ang mga pamilya nga pwersa ginpa-evacuate sa Brgy. Alim covered court sang paglaslas ni Bagyo Ompong sang nagligad nga semana./dyHB BACOLOD
