Higit sa 200 kababaihan sa Manaoag, Pangasinan ang nabigyan ng libreng pap smear at edukasyon sa kalusugan bilang bahagi ng pagdiriwang ng Women’s Month.
Ang programang ito ay isinagawa ng Municipal Health Unit (MHU) ng Manaoag sa pakikipagtulungan ng Region 1 Medical Center (R1MC), na naglalayong magbigay ng proteksyon at kamalayan sa reproductive health ng mga kababaihan.
Ayon sa Department of Health (DOH), ang cervical cancer ang pangalawang pinakakaraniwang uri ng cancer na dumadapo sa mga kababaihan sa Pilipinas. Sa pamamagitan ng libreng pap smear screening, nagkakaroon ng oportunidad ang mga kababaihan na maagang matukoy ang mga abnormalidad o senyales ng cervical cancer, na mahalaga sa pag-iwas at agarang gamutan.
Binigyang-diin ni Dra. Nicola Bethune-Malko ng MHU Manaoag ang kahalagahan ng regular na pagpapatingin. Aniya, bukas ang kanilang tanggapan para sa sinumang nais magpa-checkup, lalo na ang mga kababaihan na kadalasang nagkakait ng oras para sa sariling kalusugan.
Sa pamamagitan ng programang ito, hindi lamang check-up ang naihatid sa mga kababaihan, kundi pati na rin ang kamalayan sa pangangalaga ng kanilang kalusugan—isang hakbang sa mas malusog at mas empowered na komunidad ng mga kababaihan sa bayan. | 𝙞𝙛𝙢𝙣𝙚𝙬𝙨
