2016 Budget Sa Local School Board Sa Dipolog Gia-Prubahan Na

31

Aron magapadayon ug dili malangan ang implementasyon sa programang pangkalambu-an alang sa sector sa edukasyon, mi-aprobar bag-ohay lang ang Local School Board (LSB) sa Dipolog sa 2016 Local School Board  Budget nga maoy mamahimong makuhaan ug pundo alang sa implementasyon sa nagkalain-laing proyekto sa kalambu-an sa edukasyon sa Departamento sa Edukasyon – Dipolog City Schools.

Nasayran nga ang na-aprobar nga talaan sa gasto (budget) sa LSB mikabat sa Php9.5 milyones ka pesos karong tuiga nga gibahin sa mosunod: kapin sa 667,000 ka pesos  alang sa personal services;  kapin sa Php1 milyon alang sa maintenance & others; kapin sa Php4.9 milyones ka pesos sa non-office alayon sa Youth Development Program ug Sports Development Program; ug kapin sa Php2.8 alang sa land improvements/site development, lot purchase, ug improvement/construction of school buildings & other structures.

Atol sa deliberasyon sa nasangpit nga 2016 budget sa school board, nahibalo-an nga mitaas na ang kantidad sa logistics nga gikinahanglan alang sa maintenance, construction ug pagpalambo sa mga pisikal nga struktura sa DepEd Dipolog City Division ug mala-umon si City Schools Division Superintendent Victorina G. Perez nga madugangan ang pondo sa panalapi sa school board.

Sa laing bahin, gipahibalo usab ni SDS Perez sa miyembro sa school board nga natapos na ang pagtukod sa edepisyo sa ilang buhatan sa City Schools Division sa Dipolog nga gipahimutang karon haduol sa Olingan Elementary School. Nahibalo-an usab nga ang katumanan sa pagtukod sa maong edepisyo usa ka proyekto sa nasudnong buhatan sa DepEd ug inabagan sa Kagamhanang Lokal sa Dipolog.

Facebook Comments