Davao City – Gikatakdang magtapok ang tanang division ug department heads sa dakbayan sa Davao alang sa preparasyon sa annual budget allocation sa tuig 2019.
Atol sa gipahigayong Kapehan sa Dabaw karong adlawa, gibutyag ni Committee on Finance, Ways and Means Chairperson Councilor Danilo Dayanghirang nga kritikal sa budgeting ang research ug planning gani gikinahanglan ang presensya sa tanang mga pangulo sa matag ahensiya.
Sumala ni Dayanghirang nga usa sa ilang angay hisgutan mao ang bahin sa ginapangayo sa mga magtutudlo sa Davao nga dugang P2,000 monthly allowance ug laing rice subsidy diin mokabat sa P280-M ang gikinahanglan niini.
Gipasabot sa konsehal nga kinahangla ipaubos ang ekspektasyon sa Alliance of Concerned Teachers (ACT) gumikan daghan pang sektor ang mas nanginahanglan og funds.
Gitataw ni Dayanghirang nga pipila sa mga ginagahinan og budget sa gobyerno mao ang alokasyon sa budget sa tanang Police Auxiliaries matag barangay sa Davao, bayad sa elektrisidad sa lokal nga panggamhanan diin nasayran nga mao kini ang pinakauna nga konsyumer ingon man ang bayad sa mga poste sa suga ug ang Lingap nga ginabayran matag adlaw.
Gipaniguro sa chairperson sa maong responsableng komitiba nga paningkamutan nila og balanse base sa kung unsa ang mas gikinahanglan sa katawhan.
Dugang nini nga ma-busy na ang tanang opisyal pag-abot sa Oktubre ilabi na nga mao kini ang bulan sa filing of candidacy alang sa mid-term elections.
RadyoMaN Jason Amisola
