ROXAS CITY, CAPIZ- Nagapati kag kampante ang provincial chairman sang PDP-Laban nga si Mr. Essex Quintia nga makalusot ang Certificate of Nomination and Acceptance(CONA) ni former Governor Victor Tanco Sr nga nagapadalagan sa pagka-bise gobernador.
Ini matapos ang pagguha sang resolusyon sang COMELEC nga nagakilala gid lamang kay Senador Aquilino “Koko” Pimentel III bilang otorisado nga representante sang PDP- Laban kag ginakilala nga tagpirma sang CONA.
Nahibaloan nga si Atty Vic-vic Garcia amo ang nagpirma sang CONA ni Dr. Romualdo Exmundo nga nag-withdraw sang kandidatora nga amu naman ang gintal-osan ni Tanco.
Suno pa kay Quintia nga nagtawag sa iya si Garcia kag nagpabutyag nga maga-apelar sila sa Korte Suprema kon ano gid man ang mangin desisyon sang COMELEC Law Department.
Nagapati si Quintia nga malisyoso ang nasambitan nga resolusyon sang Comelec bangud nga ginpaguha nila ini matapos ang deadline sang substitution sang nakaligad nga Nobyembre 29, 2018.
Samtang ginpahayag dugang ni Quintia nga indi malayo nga adoptahon na lang ni Pimentel ang grupo ni Garcia kag ang tanan nga mga kandidato nga naka-file sang ila COC sa idalom sang PDP-Laban Garcia wing.
