Davao City – Gipaningkamotan sa City Health Office (CHO) nga mapailawom sa drive-thru swabbing ang tanang Public Utility Vehicle (PUV) drivers sa syudad sa Davao human gisugdan niadtong Lunes (Abril 26, 2021) sa Davao Crocodile Park.
Sumala ni Dr. Ashley Lopez, hepe sa CHO (sa interbyu sa city-owned radio), subay sa record sa City Transport and Traffic Management Office (CTTMO), gibana-banaang anaa sa 21,000 ka mga PUV drivers ang rehistrado sa syudad gikan sa tricycle hangtud sa transport buses.
Matud ni Lopez, anaa sa 500 ka indibidwal ang ma-cater matag adlaw sa drive-thru swabbing diin gawas sa COVID-19 test, adunay usay Tuberculosis (TB) screening sa area sa pagseguro usab nga luwas ang nahisgutan sa maong balatian.
“So hopefully, majority aning mga drivers atong ma-swab so that ma-verify pud nato ang status nato sa atong mga drivers because they are considered as one of the mga high-risk nga essential workers nato diri sa Davao,” segun ni Lopez.
Matud sa CHO official, posible nga lugwayan kun i-extend ang drive-thru swabbing human ang Mayo 8, 2021, kung dili mahuman og test ang target population o ihap sa PUV drivers.
RadyoMaN Kirby Manzon
