Davao City – Nagpatabang sa Talomo Police Station ang usa ka batan-ong inahan nga pasahero sa taxi tungod kay gituyok-tuyok samtang nagdagan padulong sa iyang destinasyon.
Sa blotter sa Presinto Tres, mireklamo si alyas Charm, 22 anyos, nagpuyo sa Robinsons Crest Buhangin, Davao City, tungod kay ang wala mailhing taxi driver sa Krezia Taxi nga dunay plaka LXB 163 misimang ngadto sa mingaw ug ngit-ngit nga agianan alas 7:00 ang takna sa kagabhion.
Gibutyag sa complainant nga gikan sa Robinsons Crest magpahatud kini sa Catalunan Pequeno apan samtang nagdagan ang taxi iyang namatikdan ang driver nga lain og tinan-awan kaniya ug miaksyon nag pangulitawo.
Pag-abot sa Monteritz Diversion Road gisimang sa driver ang taxi pasaka sa Shrine Hills rason sa iyang pagbalibad gumikan ngit-ngit ang maong dalan hangtud nga mideretso ang taxi sa ilang garahe kay kuno magpagasolina.
Pag-abot sa Crossing Catalunan Grande ug Diversion road Bangkal tungod sa Traffic light misyagit ang batan-ong inahan sa dihang nakakita kinig mga by-stander sa maong dapit nga maoy mitabang kaniya aron ipakanaog ang iyang mga karga ug ang taxi daling mapabulhot.
Ang inahan kauban ang iyang anak nga usa ka tuig mideretso sa stasyon sa kapulisan aron ireklamo ang maong taxi driver.
RadyoMaN Erin Lumosbog
