Dipolog City – Sa hospital na naibot ang kutsilyo nga mitaop sa walang bahin sa ilok sa usa ka 22 anyos nga ulitawo human dungaba sa wa pa hiilhing suspek nga ilang nakaengkuwentro sa may Bar Street Lounge, Martinez Street, Barangay Central, dakbayan sa Dipolog.
Ang biktima nailang mao si Agustino Lacang Dalungcas, ulitawo ug lumulupyo sa Purok 2, Brgy. Dicayas ning dakbyan, kinsa giobserbahan pa ang kahimtang sulod sa probinsiyal hospital.
Subay sa report nga nahipos sa Dipolog City Police Station, nahitabo ang insedente pasado alas 12:30 sa tungang gabii kon diin ang Biktima nga si Agsutino uban sa iyang mga higala nag-inom sa maong bar.
Niulbo matud pa ang kagubot human nasaghiran sa biktima ang lamesa sa laing nag-inom nga grupo ni alias “Jessie” nga nisangpot na hinuon sa sinumbagay.
Atol sa hitabo ang usa ka wa mailang kauban ni alyas “Jessie” nilanit ug kutsilyo doble blade dunay sima gidungab ang biktima nga maayong pagkataop sa lawas niini.
Human sa insedente ang mga suspek daling nisibat palayo sa dapit, samtang ang biktimang nagkadugo gidala sa mga kauban ngadto sa Zanorte Medical Center aron katambalan.
Sa karon anaa nay usa ka person of interest nga gipangita ang kapolisan, nga target sa ilang follow-up operation aron matumbok ang responsabli sa krimen.
