Jamindan, Capiz- Panibag-o nga 254 ka mga suldado ang nagtapos sa ginpatigayon nga graduation ceremony sang Candidate Soldier (CS) Classes 606 kag 607-2019 sang nakaligad nga Nobyembre 15 sa Camp Macario Peralta sa banwa sang Jamindan.
Ang amu nga seremonya ang ginpangunahan ni Brigadier General Eric Vinoya kag Honorable Governor Roel Degamo sang Negros Oriental nga amo man ang nagpanguna sa ceremonial entrustment sang armas sa mga bag-o nga suldado kaupod ang iban pa nga mga local officials kag mga manunudlo.
Nagbaton naman sanday Private Melven Zausa sang Barangay Ogsip, Libacao, Aklan kag Private Reydan Durante sang Purok A1, Katipunan, Sagbayan, Bohol sang award bilang Commander.
Si Durante ang ginpasidunggan man sang Physical Proficiency Awards matapos nga nakakuha sang highest rating sa Physical Fitness Test sa Class 606.
Samtang ginkilala man sanday Private Eraldex Alfornon sang Barangay Tomonoy Moalboac, Cebu kag Private Gilbert Zonio sang Barangay Ganson, Jamindan Capiz bilang Chief of Staff awards.
Ginpasidonggan man si Private Generoso Decipolo sang Brgy Poblacion Mabinay, Negros Oriental sang Physical Proficiency Awards matapos nga nakakuha sang highest rating sa Physical Fitness Test sa Class 607.
Nahibaluan nga maluwas sa pila ka bulan nga paghanas sa Candidate Soldier Course, nag-paidalom man ang mga ini sa Jungle Warfare Mountain Operation Course (JWMOC) nga ginpatigayon sang 3rd Division Training School.
Samtang positibo naman si Brigadier General Eric Vinoya nga ang nasambitan nga mga suldado ang mangin katuwang sang gobyerno agud nga mauntat ang dinekada na nga problema sa local communist sa Central kag Western Visayas.
📷 Philippine Army Spearhead Troopers
