Jamindan, Capiz – Nalista sang banwa sang Jamindan ang ika-11 nga COVID-19 RT-PCR positive kahapon nga adlaw.
Ginkumpirmar ni Jamindan Mayor Mac Valdemar nga ini ang isa ka babaye, 26-anyos, may asawa, kag residente sang Barangay Esperanza, Jamindan. Siya ang permanente nga residente sang Brgy Culasi, Roxas City, kung sa diin may mga kaso nga Local Transmission.
Ginapatihan nga didto nya nakuha ang virus antis nakapauli sa aton banwa. Sang Agosto 10, nag-abot siya sa aton banwa apang matapos ang pila ka adlaw, nanotaran sang iya pamilya nga may ginabatyag ini nga trangkaso kag hinali nga ginpaabot sa Municipal Health Officer ang amo nga sitwasyon. Gilayon nga gindala sa Municipal Quarantine Facility sang Agosto 18, kag ginkuhaan Throat Swab sang Agosto 19. Sa subong wala na sya sang may ginabatyag (asymptomatic) kag gindala sa Provincial Quarantine Facility sa Roxas City. Suno sa alkalde, ginpaidalum sa gilayon sa Lockdown ang Compound kung sa diin siya nagaistar kag padayon nga ginamonitor sang Esperanza Brgy Health Emergency Response Team.
Samtang ginpaidalum man sa Swab test ang 9 ka mga contacts nga nagapabilin nga asymptomatic.
