27-anyos nga ulitawo gianod sa baha, patay

54

Dumingag, Zamboanga del Sur – Nalumos patay ang 27 anyos nga ulitawo human kining gihigop sa tubig baha sa spillway sa Purok 2, Barangay Tamurayan, Dumingag, Zamboanga del Sur kaniadtong nakalabayng gabie.
Giila ang biktima nga Welmar Claton alyas (Tawing) ulitawo, residente sa nasangpit nga lugar.
Matud pa sa mga saksi, ang biktima mitabang lang pagpatabok sa mga motorsiklo (habal-habal) padulong ngadto sa pikas tampi sa maong spillway samtang kusog pa ang pagbul-og sa tubig.
Daghan ang mga kauban niini sa pagdayong sa mga habal-habal pagpatabok sa maong suba apan walay swerting gitouhang natapigas ang tiil niini ug diretso kining naanod atol sa pagbul-og sa tubig.
Ang maong biktima wala nakasalbar sa iyang kaugalingon tungod kay nakainom usab kini sa ilimnong makahubog human kini gikan sa usa ka birthday party.
Gisulayan kini paglanggoy sa mga kauban apan pakyas kining masalbar tungod kay kusog ang bul-og sa tubig ug kangit-ngit sa maong lugar ug paspas ang pagkaanods biktima..
Miresponde gilayon ang Municipal Disaster Risk Reduction and Management (MDRRMO) personnel sa lungsod sa Dumingag sa dapit nahitabuan apan mipadayon ang kusog nga ulan ug pagsaka sa bul-og sa tubig.
Ang patayng lawas nakita mismo ni Barangay Captain Eloy Dalandao sa barangay Valencia samtang nanigway kini diha daplin sa suba human kini nasangit sa gapnod kaganihang alas 6:00 sa buntag partikyular didto sa Purok 3, barangay Valencia, Dumingag, Zamboanga del Sur.
Base sa taho, nga dili lang kini ang unang higayon nga adunay nakalas nga kinabuhi sa maong suba, ug gitouhang ubay ubay ka mga tawo ang naanod ug naaksidenti sa maong spillway.

Facebook Comments