Polomolok, South Cotabato–Dead on arrival sa Bontoyan Hospital ang usa ka Benson Alab, 28 anyos nga nanimuyo sa Prk. Malnog, Barangay Magsaysay, Polomolok, South Cotabato human nga gipusil patay sa duha ka mga suspek nga nakalalis matud pa niini tungod sa boundary sa yuta sa ilang lugar.
Sumala pa ni Police Captain Rommel Hitalia ang Deputy Chief Of Police sa Polomolok, Municipal Police Station nga padulong na unta sa buhatan sa Polomolok PNP ang biktima uban ang iyang asawa aron nga magpatala sa nahitabong bangi nila sa yuta batok sa mga suspek apan pag-abot sa dalan sa Prk. Matulungin, Barangay Magsaysay, gipusil kini sa duha ka suspect nga sakay sa motorsiklo alas 11:00 pasado ang takna sa udto.
Nasayran nga human sa pagpamusil, dihang natumba na ang biktima, ginaugan pa kini sa suspek dayon gi-usban ug pusil nga hinungdan sa iyang kamatayon.
Personal grudge ang nag-unang motibo nga ginatan-aw karon sa kapulisan nga hinungdan sa pagpamusil. Sa karon gi-andam na sa kapulisan ang kasong murder batok sa duha ka mga suspect nga na-identify sa mga kauban sa biktima.
Sa karon, nag padayon pa ang ginahimong hot pursuit operation sa Polomolok PNP batok sa mga nakasibat nga suspek.(CDS)
