28 ka mga indibidwal naaresto sa PDEA sa ilang kinatibuk-ang operasyon sa Bukidnon

65

MIABOT ngadto 28 ka mga indibidwal ang naaresto sa Philippine Drug Enforcement Agency o PDEA- Bukidnon Provincial Office sa ilang kinatibuk-ang operasyon batok sa iligal nga druga sugod kaniadtong Enero hangtud Nobyembre 26, 2020.

Kini ang nahimong report ni Provincial Officer PDEA Bukidnon IA III Alex B. Subang sa gipahigayong Provincial Peace and Order Council (PPOC) ug Provincial Anti-Drug Abuse Council (PDAC) meeting dili pa lamang dugay.

Sa nahimong 19 ka operasyon sa PDEA-Bukidnon, mokabat ngadto sa 44.2683 ka gramong shabu ang kinatibuk-ang nakumpiska sa ilang buhatan. 2 niini ka operasyon ang gipahigayon sa 1st quarter diin 2 ka indibidwal ang nasikop ug 6.3043 ka gramo nga shabu ang nakumpiska. Sa 2nd quarter, 5 ka operasyon ang gipahigayon diin 7 ka indibidwal ang naaresto ug nakuwaan ug 12.49.81 ka gramong shabu. Sa 3rd quarter, 8 ka operasyon ang ilang gipahigayon diin 13 niini ang naaresto nga nakuwaan sa 27.668 ka gramong shabu ug 8.7004 ka gramong marijuana. Samtang sa 4th quarter, 10.296 ka gramong shabu ug 2.7672 ka gramong marijuana ang nakumpiska sa 4 ka operasyon diin 6 ka indibidwal ang naaresto. Adunay usab sila’y 112 ka intelligence operation (casing surveillance) nga nagpadayon sa kasamtangan.


Ang buhatan sa PDEA mipahigayon usab ug search and seizure operation kauban ang Malaybalay City Police Station sa Provincial Detention and Rehabilitation Center sa male and female dormitory ug sa Bureau of Jail Management and Penology (BJMP) Malaybalay diin negatibo ang nahimong resulta ug wala sila’y nakuha nga druga sa duha ka buhatan.

Dugang usab ni PDEA Provincial Officer Subang nga lakip sa ilang mga programa ang pagpanghatag sa PDEA Animated Advocacy Comics, Drug Abuse Awareness Symposium, Workshop on Documentation of the application of Drug Cleared Barangay, pagtukod sa Balay Silangan diin anaa na ang mga munisipyo sa Malitbog, San Fernando ug Maramag.

Sa nahimo niining Drug Clearing Program for CY 2020, mokabat ngadto sa 206 ka mga barangay ang gideklarang drug cleared barangay samtang 19 niini ang gideklarang certified unaffected barangay.



Mapasigarbuhon usab ang PDEA Bukidnon Provincial Office nga ilang naangkon ang Best Provincial Office for Barangay Drug Clearing Operations sa 3rd Quarter ning kasamtangang tuig.

Facebook Comments