Masobra sa 2,800 ka indibidwal ang nakapasar sa Certified Public Accountant (CPA) board exam sining bulan sang Mayo.
Suno sa ginpagwa nga resulta sang Professional Regulation Commission (PRC), yara sa 2,843 ang nakapasar sa 9,830 ka mga examinees sini.
Gikan sa Leyte province ang mga nagpanguna sa exam nga sanday Jayson Ong Chan (#1) nga may 92.50% rating, kag Jomari Jess Abellar (#2) nga nakakuha sang 91.67%, nga mga graduates sang Saint Paul School of Professional Studies – Palo.
Ikatatlo naman sa pwesto si Eddielyn Morfe sang Isabela State University – Echage, kag Stewart Herbie Tan Po sang University of San Carlos nga nakakuha sang 91%.
Samtang, puntos lang ang nangin deperensya sang #4 nga si Erra Kaye Doble sang University of San Carlos nga may 90.83% kag ni Mark Jason Abarca sang Far Eastern University nga nakakuha sang 90.67%.
Suno pa sa komisyon, nagpanguna ang De La Salle University – Manila nga may pinakataas nga passing rate nga 90.11% nga ginsundan sang USC nga may 83.72%.
Yari ang kumpleto nga listahan sang mga nakapasar:
www.thesummitexpress.com/2018/05/list-of-passers-a-m-may-2018-cpa-board-exam-results.html
Nagpapahanumdom naman ang PRC sa mga board passers nga sa June 4, Lunes, magasugod ang online registration para sa issuance sang professional ID kag certificate of registration nga magatapos naman sa June 11, Biyernes.
Sa karon wala pa sang may gin-anunsyo nga petsa ang PRC para sa oath taking ceremony sang mga bag-o nga CPA. – RCSG / iFM News Bacolod
