Nasayran nga anaa sa 1,200 ka kandidato sa pagka-kapitan, kagawad, chairperson, ug kagawad sa Sangguniang Kabataan gikan sa unang distrito ang misalmot karon sa Briefing nga gilusad sa City Comelec sa dakbayan.
Basi sa suwat pahibalo nga pirmado ni Election Officer IV Atty. Sittie Shahane Papandayan Balt, ang briefing magsentro sa hisgutanang PREMATURE CAMPAINING ug pag-edukar kanila kabahin sa Section 80 sa Omnibus Election Code.
Subay sa maong balaod, hugot gidili ang tanang kalihukan sa kampanya gawas sa gitak-da nga adlaw sa kampanya, ug ang bisan kinsang kandidato sa BSKE 2023 makalapas sa Premature Campaigning puwede musangko sa disqualification case.
Basi sa COMELEC Resolution No. 10905, ang opisyal nga kampanya magsugod Oktobre 19 hangtod 28, ug ang adlaw sa piniliay karong October 30.
Busa gihangyo ang mga kandidato sa pagtanggal sa ilang mga election campaign materials nga sayong gitaod sa ilang mga lugar aron dili ma-isyuhan og show cause order gikan sa COMELEC.
Samtang gikonpirma sab ni Davao City Police Office Spokesperson Police Captain Hazel Tuazon nga adunay pipila ka lugar sa Siyodad ang gikonsidarang hotspot area sa BSKE 2023.
Apan nagdumili pa ang Opisyal sa pagbutyag sa maong dapit kay wa pa’y basbas gikan sa labaw nga puwede nang isapubliko ang mga immediate concern areas sa dakbayan sa Davao.
RadyoMaN Joel Viray
