Davao City – Nagpabilin gihapong missing ang usa mananagat human nga nakulob ang ilahang gisakyang bangka didto sa may South San Juan, Barangay Centro Agdao ning syudad niadtong Martes alas-8:00 sa gabie.
Sa interbyu sa RMN Davao kang Coast Guard Station Davao Commander George Maganto nga wala gihapon nila giundang ang pagpangita sa nawala nga 21 anyos nga biktima nga si Clark Jason Casayuran.
Sa ikaduhang adlaw sa Rescue operation sa Coast Guard nakaplagan nila ang bangka nga gisakyan sa mga mananagat sa may baybayon na sa Block. 9 Muslim Village, Barangay Ilang ning syudad.
Kahinumduman nga naluwas sa maong insidente ang kauban usab sa biktima nga mananagat nga si Joseph Lauronal.
Gisaysay niini nga gisugat sila og dako nga balod ug kusog nga bul-og sa tubig samtang nangisda sila ni Casayuran hinungdan nga nakulob ang ilahang gisakyang bangka.
Nakalangoy si Lauronal padulong sa baybay aron makapangayo ug tabang kay nahibilin pa si Casayuran sa may bangka human kini gibikugan.
Matud ni Maganto nga magpadayon gihapon ang ilahang mga personahe aron makita na ang maong biktima.
RadyoMaN Aimee Guinita
