2nd dose sa COVID booster shot giklaro

Davao City – Gihatagan karon og katin-awan sa Davao City COVID-19 Task Force (TF), kabahin sa ikaduhang dose sa Coronavirus Disease 2019 (COVID-19) vaccine booster shot, tungod sa daghan ang nalibog human nga adunay nakatatak nga second dose sa booster shot sa vaccination card.

Gitataw ni Dr. Michelle Schlosser, Spokesperson sa Davao City COVID-19 TF (sa interbyu sa city-owned radio), sa kasamtangan, usa pa lamang ang gitanyag sa Department of Health (DOH) ug sa City Government of Davao nga vaccine booster, ug wala pay guidelines kung aduna may dugang booster dose.

“I would want to clarify po. At the moment, usa pa lang ka booster dose ang gina-offer sa atoang Department of Health ug sa atoang Local Government of Davao,” tataw ni Schlosser.

Sa pagkakaron, mamahimo na nga makapa-booster tulo (3) ka bulan human nga makumpleto ang 2 dose series sama sa vaccine brands nga Pfizer, AstraZeneca, Moderna ug Sinovac. Samtang, pwede na sa booster shot duha (2) ka bulan human sa 1 dose series sama sa vaccine brand nga Janssen.

Abri usab ang tanang vaccination hubs sa dakbayan alang sa booster dose, ilabina sa first dose, second dose, ug missed jabs sa COVID-19 vaccine.

RadyoMaN Kirby Manzon