General Santos City—sikop ang tulo ka mga security guard sa gi-claim nga luna sa pamilyang Olarte human nagpabuto ug pusil alas 10:00 pasado ang takna sa gabie.
Mga suspek giilang silang si Jay-ar Omega, 24, Dito Delapeña, 54 ug Ronald Manib, 32, pulos nakabase sa luna nga gi-claim sa pamilyang Olarte, sa Purok San Vicente, Barangay Labangal, Gensan.
Subay sa inisyal nga imbistigasyon sa Police Station 2, nasayran nga nag-agi ang grupo sa mga tawo sa maong lugar dihang kalit lang nagpabuto ug armas ang mga nasangpit nga gwardya.
Walay naigo sa insidenti apan mireport sa kapulisan ang mga gipabuthan mao nga girespondihan ang lugar.
Narekober ang 3 ka 12 gauge shotgun samtang ang mga gwardya gikustudiya sa kapulisan. Nasayran nga dugay nang dunay tension sa maong lugar gumikan daghan ang nagilog sa maong luna.
Sa karon ginahuat pa sa Police Station 2 ang desisyon sa mga reklamante alang sa pagpasang-at ug kaso batok sa mga nahisgutang gwardya.
