Sa interview sa DXDC RMN Davao kang Maria Lourdes Saldua, inahan ni Justine Mae, iyang gibutyag nga alang sa seguridad sa iyang bana, gipaundang niya kini’g pamasahero og motor ilabi na karon nga nagpadayon ang imbestigasyon, diin nalambigit sa pagkawala sa ilang anak ang amo niini nga si Police Major Michael Uyanguren, kanhi hepe sa Toril Police Station.
“Amoa gong pamuyo ‘ron, dili na sama sauna. Akong bana wala nakapanginabuhi. Amoang mga anak layo na sa amoa. Dili namo sila makauban permanente. Dako kaayo og kausaban,” matud sa inahan ni Justine Mae.
Dugang sa inahan nga iyang labing gikaluy-an ang kanunay nga pagpangita sa tulo ka mga anak ni Justine Mae nga nag-edad og uno, dos, ug tres anyos. Matag pangutana kung asa ang ilang inahan, ginaingnan na lamang nila nga nanrabaho kini sa laing lugar.
“Pagkakita sa ilang balay, nagsige’g pangita sa ilang mama. Sakitan gyud ka maminaw kay sige’g pangita sa ilang mama unya wala may mama diha sa ilang balay. Amo nalang giingnan nga nagtrabaho ang ilang mama,” sulti sa inahan.
Sa pagkakaron, ginaampo na lamang sa pamilyang Saldua ang hingpit nga kasolbaran sa kaso, ilabi na ang kamatuoran kung asa karon ang iyang anak nga kapin duha ka bulan na nga na-missing.
RadyoMaN Kirby Manzon
