3 ka classrooms nasunog sa Matanao, Davao del Sur

Davao City – Padayon karong giimbestigahan sa kabomberohan ang hinungdan sa pagkasunog sa tulo ka mga classrooms sa Sinawilan Matanao National High School, Matanao Davao del Sur alas 9:00 kagahapon sa buntag (July 5, 2022).

Sa interbyu sa DXDC RMN Davao kang Fire Officer (FO) 1 Martin Ave Biore, investigator sa Matanao Fire Station, gibutyag niini nga gilayong nakagawas ang duha ka magtutudlo sa eskwelahan una pa man nikusog ang kalayo diin walay natalang casualties sa insidente.

Gilamoy sa kalayo ang supply office, school clinic ug Science room sa eskwelahan, diin posibleng problema sa kuryente ang hinungdan.

“Naay teacher duha. Bale ang outlet daw, based daw sa ilaha is ni-spark daw ang outlet,” saysay ni Biore.

Ginasuta pa usab kung pila ang kinatibuk-ang danyos sa sunog. Samtang, padayon ang pagpahinumdom sa kabomberohan sa publiko nga i-check kanunay ang wirings sa kuryente ug siguradohong nakaibot ang mga nakasaksak, una mubiya sa balay o gambalay.

RadyoMaN Kirby Manzon

<www.avast.com/sig-email?utm_medium=email&utm_source=link&utm_campaign=sig-email&utm_content=webmail>