Report ni: Jennifer Palomo Debaja
Priso ang tatlo ka turista halin sa Pilipinas matapos gin aresto sa ginapatihan modus nga “free tour” sa Hong Kong sang money launderers.
Ginkilala ang tatlo nga sanday Enrique V., Ryan S.I., kag Maureen M.G. pareho nga call center agents sa Manila.
Gin presentar sa korte sang Enero 7 ang mga suspetsado nga naga edad 20 tubtob 30 anyos kag naga pangatubang sang kaso nga paggamit sang peke nga papeles ( ” using a false instruments ” ) sa pag apply sang bank accounts sa Bank of China kag Standard Chartered Bank.
Sa pahayag sang eksperto sa nasambit nga kaso, nahibaluan nga ginhaylo sang “ free tour” sa Hong Kong ang tatlo kalakip sang free board and lodging kag airline tickets apang pag abot sa Hong Kong gin pa apply sila sang bank accounts gamit ang mga peke nga mga dokumento bilang OFWs.
Gin aresto ang mga ini sang liwat nga nagbalik sa branch sang Bank Of China agud klaruhon kon ngaa gin reject ang ila applications. Gina patihan sang mga imbestigador nga gamiton ang accounts sa money laundering.
Sa request sang prosecutors nga 6 ka semana sa pag review sang kaso, padayon nga nakadetain ang tatlo ka suspetsado kag naka skedyul ang masunod nga hearing sa Pebrero 18 , 2019.
Sa idalom sang layi sa HK, kon sin -o man ang mapamatud-an guilty sa kaso nga paggamit sang PEKE nga papeles( “using a false instruments” ) magapangatubang sang 14 ka tuig nga pagka priso.
