South Cotabato—Tulo ka mga kandidato ang nagfile sa ilang certificate of candidacy sa posisyon sa house of representative sa first district sa South Cotabato ngadto na sa Provincial Comelec Office.
Ang mga nagfile mao silang si Polomolok Mayor Isidro Lumayag ilawom sa Partido Federal ng Pilipinas, Former Tampakan Councilor Richard Ross Barroso ug Polomolok Incumbent Councilor Atty. Leo Cordova nga susamang independent.
Matud ni Lumayag ang usa sa mga rason niini sa pagdagan mao ang subling pagserbisyo ngadto sa katawhan ug matutukan kalambuan sa tulo ka mga lungsod nga gilangkuban sa Polomolok, Tupi ug Tampakan.
Gipaklaro usab niini ang rason sa pagbalhin niini ug partido. Matud niya nga kung dili siya muoban sa administrasyon posible matud pang walay tyansa.
Samtang gibutyag usab ni Barroso nga tutukan niya ang programa alang sa kabataan, agrikultura ug kung unsaon nga matabangan nga mahimong legal ang pipila ka mga investment Scheme.
Sumala niini nga buot niya nga mahaw-as ang katawhan sa kalisod ug pinaagi sa mga investment scheme ila kining makab-ot.
Samtang gipaniguro usab niini nga kung siya ang mamahimong kongresista sa unang distrito sa South Cotabato iyang himuon ang tanan aron nga matabangan nga molambo pa ang tulo ka mga lungsod sa sakop niini.
Gibutyag usab ni Councilor Leo Cordova nga ang paghatag ug serbisyo sa katawhan sa lungsod sa Tupi, Tampakan ug Polomolok ang rason niini sa pagpapili isip kongresista sa sang first district sa South Cotabato.
Tutukan usab niini ang programa sa edukasyon ingon man sa panglawas.
Aminado si Cordova nga siya nadismaya human inay siya si Former Mayor Lumayag ang gisuportahan sa Partido Federal ng Pilipinas sa South Cotabato apan alang kaniya kini politika lang ug dili kini babag matud pa sa iyang tumong nga muserbisyo sa katawhan sa unang distrito sa probinsya.
