Davao City – Gikasohan na ang tulo ka mga lalaking suspect sa pagpangransak sa Laak Multi-purpose Cooperative sa Barangay Aguinaldo, Laak Davao de Oro de Oro alas 4:00 sa kaadlawon, May 13, 2024, Lunes.
Sa interview sa DXDC RMN Davao kang PSSg. Roel Rico, imbestigador sa Laak Municipal Police Station, iyahang gisaysay nga nagsugod ang mga suspect og pangransak sa tindahan nga bahin sa building ug sila nakakuha og kwarta kantidad P760.
Sa dihang nadunggan na sa gwardya ang kasikas, gilayon niya kining girespondehan ug gipabuthan, rason nga nadakpan ang tulo ka suspects ug nakaikyas ang lain pang kaubanan sa nahisgutan.
“Wala sila nakaabot didto sa pikas nga building nga didto daghan (ang kwarta). Kay didto sila pirmiro sa tindahan,” saysay sa imbestigador.
Gibutyag usab sa Laak MPS nga taga Davao del Norte ang mga suspect nga karon anaa na sa kustodiya sa kapulisan.
Nagpasalamat usab ang kapulisan sa kooperasyon sa publiko ug komunidad diin nasayran usab nga mitabang ang mga tanod sa lugar aron madakpan ug madala sa presinto ang mga suspetsado.
RadyoMaN Kirby Manzon
