Sa interview sa DXDC RMN Davao kang Police Staff Sergeant Carolyn Bacana, Women and Children Protection Desk (WCPD) – Police Non-Commissioned Officer (PNCO) sa San Isidro Municipal Police Station, iyang giila ang mga biktima nga sila Gerson Escoto, 30 anyos, Carlito Escoto Jr., 28 anyos, ug Felix Escoto, 34 anyos, pulos magsoon nga nagpuyo sa Purok 8, Barangay San Isidro.
Saysay sa pulis nga suki na ang magsoon sa pagsaka og lubi sa pamilya Castillo ug niadtong tungura, samtang gisaka ni Carlito ang usa ka lubi nga adunay nakadikit nga wire sa kuryente, didto kini nakuryentehan ug natagak.
“Giluwas unya niya iyang igsoon kay abi niya’g natural lang (ang pagkirig) gigakus niya. Sa dihang naa man diay live wire, naapil pud sya’g kirig. Unya pagkakita napud sa magulang, ningdagan napud ang magulang. Tulo gyud sila (namatay). Maayo gani naay nakahunahuna og tigbas. Naputol ang wire.”
Gidala pa sa Davao Regional Medical Center (DRMC) sa Tagum City ang mga biktima apan gideklara na sila nga dead on arrival.
Mipasalig usab ang tag-iya sa kalubin-an nga tabangan ang pamilya aron mapahilona ang lawas sa mga biktima.
RadyoMaN Kirby Manzon
