Davao City – Natala sa syudad sa Tagum ang sunod-sunod nga pagpanulis kagahapon, Agosto 21 ug kaganinang kadlawun sa tulo ka managlahing establisiemento sa nasangpit nga syudad.
Sa gipagulang report sa Police Regional Office kun PRO XI, gitulis sa tulo ka mga wala mailhing suspek ang Premier Image Medical SPA sa Purok 1-A, Brgy San Miguel ug nakuha ang cellphone ug 3,000 pesos nga kwarta alas 10:49 sa kagabii.
Samtang ala 1:45 sa kadlawun kaganina, gitulis ang JRJF Hotel sa Santo Niño, Dalisay Gante Road, Brgy Magugpo West ug nakuha sa tulo ka mga wala mailhing suspek ang cellphone sa security guard on duty sa nasangpit nga establisiemento human nga misulay og depensa ang sekyu apan gitutukan kini og kutsilyo sa usa sa mga suspek.
Dugang sa report nga pag abot sa alas 5:30 sa kadlawun kaganina, gitulis na usab sa tulo ka mga wala gihapon mailhing suspek ang ROYAL Budget Inn sa Abad Santos Street, Barangay Magugpo Poblacion ug nakuha ang 3,000 pesos nga kwarta lakip ang cellphone nga mukantidad 13,000 pesos.
Human sa mga panghitabo, daling misibat ang mga suspek padulong sa mga wala matinong lugar ug padayong ginaimbestigahan karon sa Tagum PNP ang mga insidente.
RadyoMaN Renz Barbarona
