Report ni: Jennifer Palomo Debaja
Tatlo ka Filipino travelers ang gin pamulta sa West Kowloon Magistrates’ Court sa pagdala sang stun guns kag iban pa nga ginadumilian nga armas sa ila bagahe.
Suno sa officer sang Assistance to Nationals Section sang Philippine Consulate sa HK, nag stop over ang tatlo ka pasahero sa Hong Kong International Airport sa lain-lain nga petsa subong nga Pebrero.
Una nga nakumpiskar sa transit passenger nga pinoy halin sa San Francisco ang pepper spray, stun gun kag extendable baton sa iya check-in luggage. Ginmultahan ini sang HK$1,700.
Ang ikaduwa nga pasahero isa ka seaman kag nag abot halin sa Xiamen Airpot. Nakaschedule kuntani ini nga mag connecting flight pa Manila. Ginmultahan ini sang HK$1,000 sa pagdala sang stun gun sa iya backpack.
Samtang, isa naman ka Filipino nga halin sa India ang Ginmultahan sang HK$1,000 sang nakit an ang stun gun sa iya check-in luggage.
Naga paandam gid sa mga OFWs kag mga turista si Consul Paul Saret, head sang Philippine Consulate General – ATN Section, nga tama ka istrikto ang laye sang Hong Kong sa stun guns, bullets o bala, pepper spray, extended batons, tear gas, flick knives and knuckledusters tungod ginadumilian ang mga ini kag ginakonsederar nga ” dangerous arms ” sa Hong Kong law.
Sa idalum sang Firearms and Ammunition Ordinance sa Hong Kong, ang sin-o man nga mapamatbatan sa nasambit nga kaso magabayad sang HK$100,000 kag maximum sentence nga five years imprisonment.
