3 lalaki dakpan sa pagpalusot og pinutol nga kahoy

Davao City – Gikasohan na ang tulo ka mga lalaki nga nadakpan human nagpalusot og mga round timber o punoan sa kahoy sa checkpoint sa Crossing Inawayan, Barangay Inawayan, Sta. Cruz, Davao del Sur, alas 10:00 sa gabii, Pebrero 15, 2023.

Sa interbyu sa DXDC RMN Davao kang Police Lieutenant Colonel Kristopher Sabsal, Acting Chief of Police sa Sta. Cruz Municipal Police Station (MPS), giila niini ang mga dinakpan nga sila Navarro Dela Cruz, 47 anyos, minyo, driver ug residente sa Bago Aplaya, Davao City; Andres Sabudan, 53 anyos, labourer, residente usab sa Bago Aplaya, Davao City ug Roland Tacder, 38 anyos, residente sa Tibuloy, Toril, Davao City.

Matud ni Sabsal nga karga sa nahisgutan sa elf truck ang 20 ka punoan sa Mahogany, 20 ka punoan sa Durian ug 40 ka punoan sa Marang.

Kasong paglapas sa Presidential Decree 705 ug Republic Act 9175 ang atubangon sa nahisgutan.

“Until now, naa pa sila sa atoang detention facility. Na-file nato ang kaso kay dili man nato sila pwede i-held sa atoang detention facility for more than 24 hours,” sulti ni Sabsal.

Pahimangno sa police official sa publiko nga likayan ang iligal nga aktibidad ug siguradohong miagi sa saktong proseso ug adunay legal nga dokumento ang mga aktibidad ug transaksyon.

RadyoMaN Kirby Manzon