Sarangani Province—tingkagol na sa silda sa Maasim Municipal Police Station ang duha ka lalaki ug usa ka babaye nga miyembro sa New People’s Army kansa una nang nasikop sa gihimong operasyon sa pagpanguna sa 27th Infantry Battalion Philippine Army ug Maasim Municipal Police Station sa may Purok River Side, Kablacan, Maasim, Sarangani Province alas 2:00 ang takna sa hapon, Domingo, July 30, 2017.
Mga suspetsadong nadakpan nailhang silang si Jojo Kolahing Alyas Bunso , Jasmin Atong Sambra alias Tata ug Raymond Mansia Damon Alyas Gab, gikaingong miyembro sa Guerrilla Front 73.
Sa report sa Maasim Municipal Police Station pinaagi ni Police Chief Inspector Golwingon, Hepe sa Maasim PNP nga target sa operasyon ang suspek nga si Jojo Kolahing alias Bunso kansa nag atubang ug kasong Murder sa Tacurong City.
Una nang nakadawat ug report ang ilang buhatan ug ang 27th Infantry battalion nga anaa sa panimalay ni Lonicito Pason ang nahisgutang suspek. pag abot sa lugar positibo ang presensya sa suspek uban ang duha pa ka kaubanan niini.
Sila gisikop human nakuhaan ug (2 ) ka grenade, (1) ka .45 caliberpistol , (3) ka hand-held radio, usa ka solar panel ug pipila ka combat shoes ug mga subersibong dukumento.
Gibutyag ni PCI Golwingon nga luyo paman nga adunay mga narekober nga eksplosibo sa posisyon sa mga suspek ila pa karon nga ginaberipika ang koneksyon sa mga suspek ngadto sa NPA.
Samtang ginasuta pa kung dunay kalambigitan ang mga nahisgutan nagdto sa kaso sa pagpangharass sama nalang sa pagpangsunog ug bus ug mga ekwepo sa MAKIMA Area.
Sa karon nagpabilin sa custodial facility sa Maasim PNP ang mga suspek ug ginaandam na karon ang kasong paglapas sa RA 10591 batok sa nahisgutang mga suspek.
