TACLOBAN CITY – Tulo nga establisyemento ha syudad han Tacloban an ginpasadhan han Bureau of Internal Revenue (BR) Regional Office 8 mahitungod han mga pagtalapas sugad han diri sakto nga pagbayad hin tax.
Sumala kan Ma. Gracia Javier, Regional Director han BIR Region 8, usa nga tindahan hin mga gulay, hardware ngan general merchandise an ira ginpasadhan matapos an pira ka adlaw nga surveillance nga ginbuhat han ira buhatan .
“Pinasara sila dahil sa mga violations na na-commit nila. Merong hindi nag i-issue ng registered receipt at invoice at under declaration ng sales. “
Mas hamubo hin 30% an gindeklara nga sales han usa nga tindahan han general merchandise. Mahitungod hini, dako an diperensya ha ginbabayaran nga income tax return han mao nga establisyemento.
An usa naman nga tindahan in napamatud-an nga diri rehistrado ha BIR an ira gin-iisue nga mga resibo.
May penalidad nga babayaran an tulo nga establisyemento.
Dugang pa han opisyal, magpapabilin nga sarado an tulo nga tindahan antis diri pa hira makagbayad.
Mayda pa gihapon mga establisyemento an nakapailarom yana ha surveillance ngan kun diri makagcomply ha panahon nga ighahatag han BIR, dayon hira nga papasadhan.
