TACLOBAN CITY – Tulo nga magparagtod an ginpamumusil patay han diri pa makilal-an nga suspek ha Brgy. Saurong, Oras Eastern Samar dida han Dominggo han gab-i Oktubre 15, 2017.
Sumala han source han RMN, nag iirignom ha gawas hiton panimalay an mga ini han ginpabuthan hira hin pusil.
Sumala han usa nga biktima nga hi Jeffrey Palencia nga nakatalawas han insidente, maupay pa daw an ira uru-istorya han makabati hira hin sunod sunod nga buto hiton pusil nga iginkaripas naman niya hin dalagan. Han pagbalik niya, naglasaw na daw iton dugo han mga biktima.
Gintawagan han RMN an Chief of Police han Oras PNP nga hi PCInsp. Francisco Sumpo pero diri kami maaram kun kay ano diri ginbabaton an amon mga tawag.
Samtang, ginlalamayan na yana an tutulo nga biktima, an usa in taga Brgy. Saurong ngan an duduha naman in aadto na ha Brgy. Tangbo, Arteche, Eastern Samar.
Naglalaum naman an pamilya han mga biktima nga makuha nira an hustisya.
