EASTERN SAMAR – Tulo nga mangirisda an kompirmado nga patay ngan tulo pa an padayon nga gin-bibiling matapos matiklob an duha nga sakayan-pandagat ha Borongan City ngan Guiuan, Eastern Samar durot han bagyo Basyang.
Ha Borongan City, tulo nga patay nga lawas an nakit-an han mga residente ha cabong beach Borongan City, Eastern Samar.
Ginkilala an mga biktima nga hira Regie Samson, 32 anyos, Wilson Alde 36 anyos, Wilfred Alde, 45 anyos nga mga residente han Brgy. Siha Borongan, Eastern Samar.
Sumala kan Ronald Joseph Hamtig, acting Chief Master of Arms han Phil. Coast Guard Eastern Samar, 4 nga mangirisda an sakay han mao nga sakayan nga naglayag dida han Pebrero 12, 2018 tikang ha Brgy. Bato, Borongan nga tipakadto unta ha Brgy Puro binubo Island.
Tungod han makusog nga hangin ngan balod durot han bagyo, naguba an ira sakayan. An usa nga mangirisda in swerte nga nakalangoy ha pinakaharani nga shoreline pero an tulo nga biktima in nadara na han makusog nga balod rason han ira pagkamatay.
Samtang ha Homonhon Guiuan, Eastern Samar naman, nagpapadayon an search and rescue operation han Phil. Coast Guard ha tulo nga biktima nga ginkilala kan Edwin Marquito, 45 anyos, Norma Princillo, 36 anyos, Avelina Cadelo, 40 anyos nga mga residente han Brgy Inapulangan Homonhon, matapos maglayag ha kadagatan dida han Pebrero 13, 2018.
Basi ha imbistigasyon han Phil. Coastguard, duha nga sakayan pandagat an nagcoconvoy kun diin sakay an mga biktima in pumalaot tipakadto ha homonhom island tikang ha guiuan, naka-engkwentro hira hin makusog nga hangin ngan balod rason han pagkahulog ha dagat han tulo nga biktima.
Labot la ha search and rescue operation nga gindudumara han Phil. Coastguard, nagbubuhat gihapon hin coastal patrol ha mga kahagrani nga barangay an mao nga buhatan.
