CAUAYAN CITY – TATLO ANG BILANG NG MGA KUMPIRMADONG NASAWI SA LALAWIGAN NG KALINGA BUNSOD NG PANANALASA NG SUPER TYPHOON “UWAN,” HABANG DALAWA PA ANG PATULOY NA PINAGHAHANAP AT PINANGANGAMBAHANG PATAY.
ITO AY AYON KAY GOVERNOR JAMES EDDUBA SA PAGPUPULONG NG KALINGA PROVINCIAL DISASTER RISK REDUCTION AND MANAGEMENT COUNCIL (PDRRMC).
DALAWA SA MGA NASAWI AY KABILANG SA GRUPO NG MGA RESIDENTENG NATABUNAN NG LANDSLIDE SA BARANGAY WESTERN UMA, LUBUAGAN NOONG NOVEMBER 10, 2025 KUNG SAAN,TINANGKA UMANO NILANG KUNIN ANG KANILANG MGA GAMIT SA LOOB NG BAHAY NANG BIGLANG GUMUHO ANG LUPA MULA SA ITAAS, DAHILAN UPANG MATABUNAN ANG KABAHAYAN AT ANG MGA TAO SA LOOB NITO.
DALAWANG BANGKAY ANG NAREKOBER HABANG PATULOY PANG HINAHANAP ANG DALAWA. AYON SA ULAT NG KALINGA PDRRMO, ISA SA MGA BANGKAY AY WALA NANG ULO, HABANG ANG ISA NAMAN AY NAWALAN NG BRASO.
KINILALA ANG MGA NASAWI BILANG SINA ERIC MAGWIN AT AKI MAGWIN, SAMANTALANG ANG DALAWANG NAWAWALA AY SINA KAGAWAD REDENTO TINIO AT RICARDO MAGWIN.
SAMANTALA, ANG IKATLONG KUMPIRMADONG BIKTIMA AY KINILALANG SI LAM-AO BAOT, ISANG 74-ANYOS NA BABAE MULA SA BUSCALAN, TINGLAYAN NA NALUNOD HABANG KASAGSAGAN NG BAGYO. LUMALABAS SA IMBESTIGASYON NA KASAMA UMANO NITO ANG KANYANG ANAK NANG HAMPASIN SILA NG MALAKAS NA HANGIN, DAHILAN UPANG SIYA AY MATUMBA AT MAHULOG SA SAPA AT TANGAYIN NG RUMARAGASANG TUBIG.
SA NATURANG PAGPUPULONG KANINANG UMAGA, IPINAHAYAG NI GOVERNOR EDDUBA NA MAGBIBIGAY NG TULONG PINANSYAL AT IBA PANG AYUDA ANG KALINGA PROVINCIAL LOCAL GOVERNMENT UNIT (PLGU) SA MGA NAULILANG PAMILYA.
INATASAN DIN NG GOBERNADOR ANG ENGINEERING OFFICE AT KALINGA PDRRMO NA AGARANG TUMUGON SA MGA APEKTADONG LUGAR, LALO NA’T ILAN SA MGA BAYAN TULAD NG TANUDAN, TINGLAYAN, AT PASIL AY NANANATILING ISOLATED DAHIL SA MGA NASIRANG KALSADA AT TULAY.
